0617~平安鐘

17-06-2011  星期五

早2年開始, 間唔中都有人打電話嚟問我屋企有無老人家, 要唔要裝平安鐘, 但之前媽咪唔想, 所以無乜點理.

而今日有間叫『香港平安鐘』直接打去我屋企同我媽傾, 傾完後我媽好似有d興趣裝, 那女職員仲話安裝免費的, 只係每個月俾$100.
可能我媽俾那女職員的資料有點問題, 所以我媽叫她直接打電話俾我同我傾

那女職員同打電話我講因為我媽係65歲以上, 而且係房屋署的住戶, 所以有支助, 免安裝費只係每個月俾$100喎~~
她仲話唔係個個都免費, 要攞資料去政府申請, 睇下申唔申請到喎

那女職員向我媽攞咗屋企地址和電話號碼資料, 再向我核對……但當佢一講到交每個月的月費時就被我“兇”佢, 我同佢講等我返屋企同家人傾好之後才講.
咁就CUT 佢線了

之後同d同事講開, 同事叫我check清楚怕被人呃. 咁我上網睇, 見有3間資料都唔知邊間才是正確, 所以上網問下朋友囉!

請問有無人知安裝「平安鐘 」那一個機構才正確? 有什麼分別??
1, 香港平安鐘協會有限公司 http://www.hongkongssa.com/services/index.html
2, 香港平安鐘協會 http://www.hongkongssa.com/index.htm
3, 一線通平安鐘 http://www.schsa.org.hk/b5g/service/pel.html
4, http://www.easilink.hk/utcfs/Templates/Pages/Template-46/1,8060,pageId=38400&siteId=3218,00.html
(這是一個朋友的爸爸生前用過的, 佢話話這機構都好好, 每隔幾日都會CALL佢爸爸一次傾計, 順便試機)
5, 關愛鈴@浸會愛羣社會服務處 www.oklink.org.hk

唔知係唔係因為 一線通 做電視做得多, 所以多人識呢? (我都係其中一個 )

內心七上八落的情況下打電話去屋邨個長者中心問, 我諗長中心職員處理咁多長者問題應該唔多唔少會知啲

打去長者中心, 原來佢有個專處理平安鐘的職員喎她話平安鐘公司現有8間, 而質素好參'痴', 而質素叫佢哋安心係一線通和另一間「關愛鈴」.

仲話有某啲公司的平安鐘部機接收得唔好或好易壞

而且年前報紙講過一個case...... 有一個老人家按平安鐘之後無反應, 最終失求過身了.  後來發現原來平安鐘機裝咗咗, 但無接線的, 所以那長者點按鐘都無用

仲講有些長者本身已安裝一線通的, 但某些平安鐘公司叫長者cut咗本身那個, 裝佢哋公司喎! 咁HARDSELL的.... 好得人憎囉

長者中心職員仲話近年有個係手提電話平安鐘, 這個出街都可以用, 一線通要買機, 大約$1300 + $14x 月費, 而「關愛鈴」就$0 機價, 月費$199.
而手機好啲或家居的平安鐘好啲就要睇各人需要, 當然最全面和支付到的話, 就係2樣出晒....

餅餅媽 幫我問左朋友仔, 佢朋友仔上年做一線通平安鐘, 正確嚟講佢地個機構名係 “長者安居服務協會”, 鄭經漢係主席, 同埋係香港唯一一間非牟利既平安鐘.
另外仲有幾間, 有香港平安鐘協會, 關愛鈴等私人機構既, 如果使用者係攞綜援既, 邊一間都無分別既, 因為社處邊一間都會支助, 但如果問邊間最好, 佢話係一線通~~ 因為佢地要求員工既標準好高~

一線通平安鐘係用音頻既, 佢會每半小時左右會同用戶既鐘做一次聯系, 確保鐘運作正常,呢種叫自測, 如8小時以上不能自測既話, 1. 鐘本身會響, 2. 協會會收到無自測信號, 會叫姑娘電話比用戶, 確保佢地無事, 有需要時會找聯絡人添~~
呢個自測係在固網電話使用既, 即使PCCW, 如果你是用eyez多媒體電話, 是會影響自測功能. 其實每一間電話公司, 佢都會有support平安鐘既電話線, 只要你安裝時同佢講:是用來駁平安鐘既, 咁佢就會供應條固網比你, hkbn都會有架~~ 用緊既你話要轉既話都唔一定要加錢or簽好耐合約囉, 因為是平安鐘用, 電訊公司一定會相就~~ 當然, pccw係可靠d既, 因為如果大廈停電pccw電話仲通緊, 唔會影響平安鐘;
但hkbn如果大廈停電係會無電話用架, 因為佢地無emergency equipment比機樓既~

平安鐘唔係可以保住老人家條命, 只是比佢地盡快得到救援既工具, 平安鐘係一部電話, 接通24小時既call center, 佢地打電話去叫車同平日大家打去999既速度係一樣, 要用平安鐘既係, 因為你一按, 平安鐘就知你既資料, 你只要一句 “叫車” 或是簡單指令, 姑娘會幫你清楚交代晒你既地址, 你需要咩幫手, 仲會通知埋你既家人, 如果自己打999, 點會講得到咁多野丫~

信唔信得過是好個人既睇法, 因為間間都係$100一個月, 你唔用隨時都可以轉, 無合約既, 今日登記明天就上門裝啦, 一線通就最少用3個月, 其他既就唔知啦, 不過都可以考慮下一線通!

朋友在一線通做左一年夜間接聽電話既姑娘, 佢地對接聽服務既要求頗為嚴格, 所以就算佢轉左工都覺得一線通是比較好的一間. 佢哋成日要上training & briefing, 包括一D心理輔導, 佢講過一個case好有意義既... 有個老人家想自殺, 我唔記得是想開煤氣定燒炭, 臨take action時個老人家打俾姑娘講遺言; 姑娘二話不說, 只叫佢去斟杯水俾姑娘, 然後返黎聽電話, 個姑娘就利用呢段短短既時間去報警, 個老人家都未點火, 警察已入屋, 個故事好短但好感人囉~ 另外佢地有時用電話幫左D老人家入院或是什麼, 佢地都會再打去搵聯絡既家人, 睇下個老人家出左院未...

 

另一網友話一線通平安鐘係眞架~ 佢阿爺都係用緊呢個,幾好架佢話~ 天氣轉凍呀,過時過節呀,都會打嚟問吓你點,提醒你著衫呀,,,,,有次佢地諗住提我阿爺天氣凍著衫,但打咗幾次都無人聼,即係打俾我阿爸問咩事,,,好似幾好幾盡責咁~

 

 

一線通要俾2個月按金, 而其他好多都唔駛, 裝那間都好, 最重要係之後服務.
但聽大家都話一線通好, 我諗一線通係我首選
而現在最重要係由HKBN轉為PCCW先